إنت ألله

يا هَالساكِن خلف غيومَك      يـــــــا هـَالغــــــافي بالإيّــــــــام

قـالو إنُّو نـِحنا هـمـومَك         وقالو بتظهَر بالأحلام

 لَيْــك حـجـارَك عَـم تِــتعـَـلاّ    وتـَحتا ولادَك عم تِــنهان 

قولك هيدا إنتَ ألله              اللي مخبّا خلفو الإنسان

 قالو إنّك بالقربانِه                ومعلَّق عالحيط بْصورَه

وبالترتيلِه والأغاني             والشمعَه اللي مشعشَع نورا

 بس إنتَ النور البعيوني        وإنتَ الخفقَه جُوّا القلب

إنتَ الحريّه المجنونِه           وإنت الثورَه وإنت الحبّ

 مش إنتَ ألله المن فوق       ومش عَ عرش السيادِه

إنت الفرحَه وإنت الشوق     مْشِيت بدرب الشهادِه

 غسّلت الإجرَين بحُبّ          والإيد الجرْحِت جسمك

مْسِكتا ومشَّيتا عَ الدرب      وِحْفَرت بقلبا إسمك

 إنتَ صرخِة ثورا بتعلا           وإنتَ صوت المظلومين

إنتَ الحقّ العم يتجلّا          إنتَ خبز الموجوعين

 إنت الخبزِه العم تتصلّا         والخمرَه جُـوّاة الكاس

إنت شمس الدِنيِه كِلّا        اللي بتشرق من قلب الناس

                   إنتَ وحدك إنت ألله