صلاة العيلِه بزمن الصّوم

(بتصلّي هالصلا العيله كِلّا، مجتمعين حول الإنجيل، وشمعَه مضوّايِه، مرَّه بالجمعَه أو أكتر، بزمن الصوم)

البَيّ – بسم الآب والإبن والروح القدس، إله واحد

الكِلّ – آمين

الإم – بهالصوم المبارَك، منرافقك يا ربّ، نحنا وعم نتأمّل بتعليمِك وعجايبَك، وخصوصي بمحبّتك الكبيرِه يلّي وصّلِتَك للعذاب والموت عَ الصليب،

ومنوعدك إنّا رح نتشبَّه فيك ونتمرّس عَ التضحيِه متلك، إنت اللي ضحَّيت بحياتَك كرمالنا.

البيّ – رح نصغي أكتر وأكتر لَولادنا، ونَعطِيُن من وقتنا.

الولاد – رح نسمع كلمِة أهلنا، ونعمل مجهود أكبر تَ نرضِيُن، ونعيش بسلام حقيقي واحترام لبعضنا.

إبن أو بنت – رح نحارب فينا الأنانيِّه والطمع والفجعَنِه والبِـخل، والكسل والكبريا والغضب، وكلّ الأهواء المنحرفِه.

إبن أو بنت – منوعدَك يا ربّ، نقرا الإنجيل، ويكون الإنجيل رفيقنا ومرجعنا بكلّ ظروف حياتنا.

ترتيلِه: ربّي أنتَ طريقي في معاثـر الحياة ربّي أنتَ رفيقي عِنْدَ ساعةِ الممات

أنتَ وحدَكَ دَعَوتْ، أنتَ وحدكَ رَجَوتْ أنتَ غايـةُ المنى، أنتَ مصدَرُ الهَنَا

أنتَ نـارٌ لقلبي، أنتَ أيضاً نَسيم أنتَ هَدْيٌ لِدَرْبي، أنتَ فجريَ الوسيم

أنتَ وحدَكَ دَعَوتْ، أنتَ وحدكَ رَجَوتْ أنتَ غايـةُ المنى، أنتَ مصدَرُ الهَنَا

(الكلّ بيمسكو إيدَين بعضُن)

البَيّ والإم - منكرّسلَك يا ربّ عَيلتنا الزغيرِه، باركنا وِغْمُرنا برحمتك: بَعِّد عنّا كلّ شرّ وخلّينا نكبر بمعرفتك وبمحبّتَك. بارِكْ شِغلنا وجهدنا، وفتحلنا دِينَيْنا وعِينَينا وقلبنا، تَ نتعلّم وننضَج بعد كلّ فشل ممكن نمرق فيه، أو حزن مْنِتعَرَّضْلو. وخلّينا يا ربّ، رغم كلّ شي، نكمّل المسيرَه معك، متل يوحنا الحبيب وإمّك مريم، يلّي ما تركوك أبداً، ورافقوك بدعسات سابتِه وإيمان أكيد، حتّى الصليب. عبّيلنا قلبنا من الفرح اللي بيِنبَع من حضورَك فينا، وخَلّي إنجيلَك يكون نور يِهدينا بعتمِة هالدِني.

إبن أو بنت – منطلب منّك يا ربّ تعطينا القوِّه والإرادِه، تَ نِمشي عَ دَعساتَك بالصوم والتجرّد والصلا.

• فحص ضمير عن المرحلِه الماضيِه (شو الإشيا الكان لازم نعملا وما عملناها، والإشيا الما كان لازم نعملا وبعدنا عم نعملا ؟)

• كلّ واحد من أفراد العَيْلِه بِينَقّي للمرحلِه الجايي:

1- تضحيِه (إماتِه) بيقَرِّر يعمِلا

2- عمل خير

3- ومقاطع من الإنجيل للقرايِه والتأمّل

ترتيلِه عرَفتَ بأن قد تعَثَّرَ دَرْبي فَجِئتَ إليَّ تقودُ خُطايْ

وتعرِفُ أنِّي بِحُبِّكَ رَبّي أَهيمُ كَصَبٍّ وفيكَ هَوايْ

وليسَ لِدَربي سِواكَ رفيقٌ يا ألله يا ألله

نَهَبْتُ الطريقَ أُسائِلُ عنكَ بِحَيْرَةِ ضعفي وَأوهانِيا

سَمِعتُ الخليقَةَ تُنشِدُ لحناً لِقَلبي فَتُنعِشُ إيمانِيا

حَلَتْ لي الإقامةُ داخِلَ بيتِكَ يا ألله يا ألله

إذا غِبْتَ عَنِّي شَرَدْتُ بِذاتي غَرِقْتُ بِحُزني دَهاني الضَجَرْ

وإن كُنْتَ فِيَّ حيَيتُ فَرِحْتُ نَثَرْتُ الطُيوبَ فَرَشْتُ الزَهَرْ

تَطيبُ الحياةُ تطيبُ بِقُربِكَ يا ألله يا ألله

البَيّ – رفعنالك يا ربّ هالصلا، طالبين منّك تتحنّن علينا وتسامحنا عَ خطايانا وتقصيرنا وإهمالنا، ونحنا منوعدك نكون أمينين إلَك ولبعضنا بزمن الصوم هيدا، زمن الصلا والتجرّد والعطاء، إلك كلّ المجد والشكر عَ نِعَمَك وخيراتَك، هلّق وبكلّ وقت وللأبد.

الكِلّ – أبانا الذي في السماوات...

السلام عليك يا مريم...

البَيّ والإم - المجد للآب والإبن والروح القدس.

الكِلّ – المجد والشكر لألله بكِلّ وقت وعَ طول الإيّام. آمين